ترانہ وفاق المدارس العربیہ پاکستان 
کلام شاعر محمد ولی صادق 

بلند تر مقام ہے یہ کیسی آن بان ہے
وفاق کا نظام بھی خدا کی ایک شان ہے
ہے راہِ حق پہ گامزن یہاں جو کاروان ہے

اسی لیے زمین بھی یہ رشکِ آسمان ہے
خزینۂ علوم کا یہ ایک پاسبان ہے

سمیٹیے یہ علم کا عظیم تر خزینہ ہے
یہاں سبق جو سیکھ لے وہ عاشقِ مدینہ ہے
جو وار دشمنوں کا ہو تو آگے ان کا سینہ ہے

یہاں کا ایک ایک فرد جیسے اک چٹان ہے
خزینۂ علوم کا یہ ایک پاسبان ہے

اسی کے زیرِ سایہ ہے سکون بھی قرار بھی
تمیز بھی شعور بھی سلیقہ بھی وقار بھی
اسی کے دم سے چار سو وطن میں اِک بہار بھی

ہیں پھول جس میں امن کے یہ ایسا گلستان ہے
خزینۂ علوم کا یہ ایک پاسبان ہے

جو نور خود حِرا سے لے کے آگئے تھے مصطفیٰؐ
وہ نور بانٹتا ہے یہ گلی گلی جگہ جگہ
یہ رعب اور یہ دبدبہ یہ گونجتی ہوئی صدا

علیؓ کی ذوالفقار ہے بلالؓ کی اذان ہے
خزینۂ علوم کا یہ ایک پاسبان ہے

وہ حافظوں کا جمگھٹا یہ ہے مفسرین کا
نکل رہا ہے قافلہ یہاں سے علمِ دین کا
بتا رہا ہے وصف جو ہمیں اکابرین کا

یہ سنتِ رسولؐ کا اِک ایسا ترجمان ہے
خزینۂ علوم کا یہ ایک پاسبان ہے

الٰہی دیں کی خدمتوں سے اس کو بہرہ ور کرے
اسی کے ابرِ فیض سے زمینِ خشک تر کرے
تمام کائنات میں تو اس کو معتبر کرے

یہ رحمتوں کی چھاؤں کا عظیم سائبان ہے
خزینۂ علوم کا یہ ایک پاسبان ہے