ایام شتاء کی نسیمِ صبح گاہی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آج صبح آنکھ کھلی تو ہوا میں ایک ایسی سردی گھلی ہوئی تھی جو احساس دلاتی ہو کہ ایّامِ شتاء پوری آب و تاب سے موجود ہیں۔ دروازہ کھولا تو نسیمِ صبح گاہی نے یوں استقبال کیا جیسے کسی پرانے شناسا نے بغی

ر کچھ کہے حال پوچھ لیا ہو۔ فضا میں ایک عجب سی شفافیت تھی۔ آوازیں کم اور معنی زیادہ محسوس ہو رہے تھے۔ سڑکیں ابھی پوری طرح بیدار نہ ہوئی تھیں۔ وقت جیسے ذرا ٹھہر کر سانس لے رہا ہو اور ہر شیئ اپنے وجود کی سادگی میں خوبصورت دکھائی دے رہی تھی۔۔۔۔۔۔

اس لمحے محسوس ہوا کہ صبح دم کی ابتداء تو ہے ہی ساتھ انسان کے اندر بھی ایک نئی ترتیب قائم کرتی ہے۔ سرد ہوا چہرے سے ٹکرائی تو خیال جاگا اور دل میں ایک غیر مرئی سی طمانیت اتر آئی۔ نہ کوئی عجلت، نہ کوئی ہنگامہ بس شتاء کی سنجیدہ صبح، نسیمِ صبح گاہی کی باوقار رفاقت اور ایک ایسا منظر جسے دیکھتے ہوئے قلم خودبخود سچ لکھنے پر آمادہ ہو جاتا ہے۔۔۔۔