Bint-e-Abul Khair Azmi
Log kehte hain ghusse mein kahe hue jumlon ko yaad mat kiya karo
Magar koi yeh nahi batata ke dil ko na yaad rakhne se roka kaise jaye.
Dil to woh kaghaz hai jis par har lafz be ijazat likha jata hai,
Gussa chand lamhon ka mehman hota hai magar is mein kahe gaye lafz barson
dil ke goshon mein thehar jate hain.
Woh lafz jo shayad kehne wale ke liye sirf waqti bharaas hote hain
sunne wale ke liye puri ek kahani ban jate hain.
Lehja mamool par aa jata hai
chehre par muskurahat bhi laut aati hai
rishte ki zahiri girhein bhi khul jati hain
Magar woh jumla woh ek jumla
khamoshi se dil par naqsh ho jata hai.
Na woh shor machata hai
na shikayat karta hai
bas mauqa milte hi khamoshi ko bojh bana deta hai.
Yeh kehna aasan hai ke “bhool jao”
magar har dil itna mazboot nahi hota ke woh talkh lafzon ko
yun hi hawa mein tehleel kar de.
Kuch dil aaine ki tarah hote hain ek daraar pad jaye to aks bikhar to jata hai
magar nishan baqi rehta hai.
Kuch baatein aawaz ban kar nahi yaad ban kar aziyat deti hain.
Woh yaadein jo raat ki tanhai mein baghair ijazat laut aati hain
aur dil se sawal karti hain
ke kya waqai mein itni hi be waqat thi?
Asal zaroorat yeh nahi ke ghusse ki baatein yaad na ki jayen
balke yeh hai ke ghusse mein baat hi na ki jaye.
Kyunke zuban se nikle hue lafz teer ki tarah hote hain,
wapas lauta to liye jayen magar zakhm apna wajood maang leta hai.
Maafi ek khoobsurat amal hai
yeh dil ko halka zaroor kar deti hai
Magar har baar
yaadon ka wazan mukammal taur par khatam nahi kar paati.
Isi liye khamoshi aksar ghusse se zyada meherban sabit hoti hai,
aur bardasht bohat se toot'te dilon ko judne ka mauqa de deti hai.