Mohabbat: Jazba ya Zimmedari?

Mohabbat insani fitrat ka aik mazboot jazba hai, magar sawal yeh hai ke kya mohabbat sirf aik waqti ehsas ka naam hai ya is ke sath zimmedari bhi juri hoti hai? Mojooda daur mein mohabbat ko aksar aik din, aik tohfe ya aik talluq tak mehdood kar diya gaya hai, halanke haqeeqat is se kahin ziyada gehri aur wasee hai.
Ahl-e-ilm ke nazdeek mohabbat mehaz dil ki kefiyat nahi balkay aik akhlaqi zimmedari hai. Agar mohabbat sirf khwahish ka naam ho to woh khud gharzi mein badal jati hai, aur agar is mein qurbani, wafadari aur hudood ki pasdari shamil ho to woh kirdar ko sanwarti hai. Isi liye shariat aur aqal dono aisi mohabbat ki rehnumai karti hain jo insan ko behtar banaye, nah ke usay apni khwahishat ka ghulam bana de.
Yeh bhi haqeeqat hai ke mohabbat ka asal imtihan davoon mein nahi balkay ravaiyon mein hota hai. Jo mohabbat insan ko walidain ke huqooq bhulane, zimmedariyon se farar ya akhlaqi hudood torne par aamada kar de, woh mohabbat nahi balkay nafs ka dhoka hai. Is ke bar aks jo mohabbat sabr sikhaye, khud ehtisabi paida kare aur doosre ke haq ko muqaddam rakhe, wohi mohabbat qabil-e-ehteram hai.
Lehaza yeh samajh lena zaroori hai ke mohabbat ka talluq sirf jazbaat se nahi, balkay shaoor se bhi hai. Jab jazba zimmedari ke tabay ho jaye to mohabbat fasaad nahi, islah ka zariya banti hai. Yehi woh miyar hai jis par mohabbat ko parkha jana chahiye, nah ke mehaz rasmon aur naaron ki bunyad par.

 🌸 Az qalam Aalima  Fizza Sabahat 🌷