Azadi Ki Nemat
Aik shikari ne aik hiran ko qaidi bana liya aur us ko gadhon ke astabal mein band kar diya. Hiran kyunke azadi ka maza chakh chuka tha aur jungle mein azadana ghoomne phirne ka aadi tha, is liye use is qaid se badi pareshani hui. Woh is astabal mein wehshat zada ho kar idhar udhar bhagta magar rehai ke liye koi rasta nazar na aata tha. Is shikari ne raat ke waqt gadhon ke samne ghaas daali. Gadhe khushi khushi ghaas khane lage magar hiran ko chain na tha, woh kabhi idhar daudta kabhi udhar daudta. Gadhon ki khorak ki taraf us ne aankh utha kar bhi na dekha. Is qaid ko us ne apni maut khayal kiya.
Hiran bohat din tak gadhon ke astabal mein qaid raha. Jaan kani ki halat mein is tarah bechain tha jaise machli khushki par bechain hoti hai. Us ki halat is mushk ki tarah thi jis ko mengni ke saath rakh diya gaya ho. Aik gadhe ne hiran ki yeh halat dekhi to us se kehne laga: Ae hiran! Tera mizaj to shahana aur amirana hai magar tu bilkul khamosh hai, apne munh se koi baat nahi karta, aakhir kya wajah hai?
Dusra gadha hiran ka mazaq udate hue bola: Is ki baat to moti hai, yeh is ko sasta kab farokht kar sakta hai. Aik aur gadhe ne luqma dete hue kaha: Ae hiran! Agar tujh mein itni hi nazuk mizaji hai to tu shahi takht par takiya laga kar baith ja. Aik aur gadha jis ko badhazmi ki shikayat ho gayi thi aur woh apne hisse ki ghaas na kha saka tha, us ne hiran ko ghaas khane ki dawat di.
Hiran ne inkar mein sar hila diya. Woh gadha kehne laga: Mujhe maloom hai ke tu yeh inkar nakhre se kar raha hai ya phir ghuroor ki wajah se parhez kar raha hai.
Hiran ne kaha: Ae gadhe! Tu hi yeh khorak kha kyunke is se tere aaza taza aur zinda hain. Main to jungle ki zindagi se manoos tha, main ne sayon aur baghon mein aaram kiya hai. Agarche main taqdeer-e-khudawandi se azab mein phans gaya hun lekin is azadana mizaj ko na badalna to mere ikhtiyar mein hai. Agar main is waqt museebat mein giraftar hun to is ka yeh matlab to nahi ke main apna azadana mizaj hi badal dalun.
Gadha kehne laga: Humein kya pata ke tu jungle mein kya karta tha. Dusra gadha bola: Yeh hiran to aise hi laf zani kar raha hai, pardes mein kyunke nawaqif log hote hain is liye shekhi bagharne aur kahein marne ka mauqa hota hai.
Hiran ne kaha: Meri baat par yaqeen karo. Mera nafa mera sab se bada gawah hai jo ke oud o anbar se bhi badh kar khushboodar hai, lekin is nafa ki khushbu to sirf wohi sungh sakta hai jo sahib-e-dimagh ho. Gobar sunghne wala gadha is ko kaise sungh sakta hai.
Is hikayat se yeh nateeja nikalta hai ke azadi ki nemat ki qadar wohi jaan sakta hai jo is nemat se behra mand ho chuka ho.
[[IMG_TOKEN_X]]